الصفحة الرئيسية › أخبار وطنية

أخبار وطنية الاستاذة نائلة سليني توجه هذه الرسالة الى عبد الكريم الزبيدي

توجهت الاستاذة نائلة سليني توجه برسالة الى المترشح الى الانتخابات الرئاسية عبد الكريم الزبيدي ورد فيها ما يلي:

"صباح الخير يا جماعة.. عندي كليمتين نحبهم يوصول للأستاذ الزبيدي إن سمحتم.. وقرّرت باش نحكيهم بلغتنا التونسية.. ونقلّو:
تابعت سيدي الكريم حوارك مع مريم بالأمس.. وانتبهت لكلّ عبارة وكلمة نطقت بيهم .. واسمحلي في أن أعبّر عن تخوّفاتي بعدما سمعتك مليح .. ثمّة مسألة هامّة سيدي الكريم تجاوزتها وهي حسب رأيي مشكلة المشاكل.. يا سي الزبيدي أحببت أم كرهت إنت مترشح لمنصب سياسي بامتياز.. وفي حديثك تنادي باش نسلخو هالمنصب من هويتو السياسية ويتحوّل إلى مركز وظيفي من جملة الوظائف العمومية..

ما تنساش أنّك تدخل مجال اختصاص هو غير مجالك الأصلي، اللي هو مجال السياسة.. و عليك أن تتخلّى عن المشرط والتبنيج في التعامل مع تونس وقضاياها ومع شعبها اللي ما عرفش الراحة منذ 9 سنوات.. المريض كيف يجيك يكون مستسلم وراضي باللي باش تقرّروا فيه.. لكن رئيس الجمهورية باش يواجه قضايا ويواجه شعب مصعصع... قاعدلو بالمرصاد.. ويحاسبو على كلّ دقيقة وجزئية.. ولذا سامحني الشي ما يركبش على بعضو.. والخوانجية باش ياكلوك ماكلة والفاسدين أيضا باش يبلعوك ويحطو الرئاسية في المكتوب..

أنا اشتغلت معاك يا سي الزبيدي 9 سنين وما عندي ما نقول فيك من حيث الانضباط في العمل، لكن في الرئاسية ثمّة ثعالب وثعابين باش يدورو بيك وموش باش يخلّيوك تخدم بحسب اقتناعاتك، واللي يزيد يخوفني أنّ شوكات في الفريق متاعك.. وهذا دليل على أنّو ما تغير شي .. ودار لقمان على حالها .. والنهضة مطمانة لأنّ عينا من أعينها موجود.. وبقات وفية لنفس السياسة اللي سطرتها منذ 2011..

والدليل على كلامي تلقاه في حديثك عن " المصالحة" اللي باش يولّي مصطلح يعوض "التوافق" بعد ما الناس لفظتو و كرهتو.. فهذه المصالحة اللي رميتها في حديثك كيفما يرمي فلاح بذرة باش تكون قايمة على أيّ شيء؟؟؟ هاو القضاء كيفما قالك الخليفة 6 بتّ في التهم وبرّأ الإخوان؟ وقبل كلّ شيء عن أيّ قضاء نتحدّث ؟ اللي ركبو البحيري وما خرج من العدل إلاّ ما أحكم وثاقو؟؟؟

يا سي الزبيدي إنت تحكي مع ناس مزّالت ما دفنتش موتاهم، ورامينهم في الكياس مطالبين بحقهم ، وما قاموش بمراسم الدفن، ويتجاوزو الحداد وكيفما يقولو الفرانسيس on n'a pas fait le deuil .. مخنا واقف.. معناه حابس في مسائل دقيقة لها صلة بالموت معناه الفناء.. شعب خطفولو ولادو من أحضانو ورماو بيهم في محرقة سوريا.. كيفاه تراها هالمصالحة؟؟

وبربّي اللي أشار عليك تذكر نماذج أخرى نجحت في العدالة الانتقالية قلهم خلّيو نصايحكم عندكم، لأنّ لكلّ شعب خصوصيتو..

وفي الأخير نحب نأكّد راك يا سي الزبيدي مترشّح لمنصب يتطلّب شخص فايق وحاضر البديهة وسريع في ردّة فعلو .. وما تنساش باش ينتخبك شعب كامل ويمكن هالشعب في أكثرو ما ينتميش لأي من هذه الأحزاب المتسلقة اللي شلكتنا، وأنّ هذا الشعب إذا اختارك فلكي تستجيب لمشاغلو وتكون إنت نفسك وقبل أيّ كان مريض بها المشاغل..

ما حاشتناش بربو robot يتسكّر ويتحل حسب الطلب.. وإذا دخلت القصر بهذه العقلية فتأكّد أنّ الكلاب اللي كبرت وقوات باش تعزلك عن الشعب وعن مشاكلو وتاخذك رهينة.. وما عادش باش نسمعو صوتك أصلا.. فرجاء أن تغيّر ورقتك الانتخابية وتضمنها مسائل نابعة من القلب إلى القلب.. وفي نفس الوقت يكون كلامك متناسق مع وجه الفريق اللي يقودلك الحملة.. معناه فريق ما يكركرش وراه ذكريات حزينة تشهد على المخلّفات اللي خلاّها الباجي.. وما تنساش أنّ الباجي عمرو ما كان ملايكة .. وخان الخزينة الانتخابية اللي رجعتو رئيس.. وموش اليوم باش ننساو المحن اللي مرينا بيها نتيجة توافقاتو.. لكن مع ذلك نطلبولو الرحمة.. والتاريخ كفيل بالمحاسبة... وربي معاك"